تحقيق مع جاموسه!!!!!!

تحقيق مع جاموسه!!!!!!!!




قررنا اليوم فتح باب التحقيق مع الجاموسة المتسببة في حادث قطار العياط.. المتهمة أتت إلينا في سيارة نصف نقل متأخرة نصف ساعة لأنها كانت مشغولة في سوق البهائم صباحا

س: اسمك؟

ج: جاموسة

س: أين كنت قبل لحظة وقوع الحادث ياجاموسة؟

ج: بعد إذنك يابيه بلاش شتيمة وقلة قيمة.. إيه جاموسة دي؟


س: هذا اسمك المسجل لدينا.. أكرر.. أين كنت قبل لحظة وقوع حادث القطار؟

ج: أنا كنت في الغيط بتاع صاحبي الحاج حمدان وقاعدة آكل ومزاجي عنب ومكنتش أعرف أن هيحصل ده كله.

س: وما الذي حدث؟

ج: أنا قلت أروح اسلِّم علي الجواميس أصحابي في غيط الحاج طلبة اللي علي الناحية التانية من القطر عشان سمعت من ناس أن فيه أمراض جديدة وصلت للبهايم.. قلت أروح اتطمن.. أي نعم وزارة الزراعة نفت الموضوع.. بس هوه مين فينا اللي بيصدق الحكومة يابيه؟

س: وما الذي حدث بعدها؟

ج: كنت ماشية علي مهلي عادي وأنا علي شريط القطر لقيت فيه حتة صفيحة جاية من بعيد.

س: هل تقصدين القطار؟

ج: يابيه أنا بصراحة ماعرفتش إنه قطر إلا من زمارته.. إنما هوه باين من بعيد إنه صفيحة زي بتاعة السمنة كده.. وكان فيه ناس كتير متشعلقين فيه من كل جانب.

س: ولماذا لم تتحركي بعيدا عن القطار؟

ج: يابيه وأنا هاخاف ليه بس؟؟ أنا لا خدت فلوس من بنوك وهربت، ولا خدت رشوة في مشروع «ابني بيتك».

س: ولماذا لم تفعلي ذلك؟

ج: عشان أنا مش محتاجة بيت.. أنا ساكنة في دوار الحاج حمدان.

س: لا أقصد ذلك.. أقصد لماذا لم تتحركي من أمام القطار؟

ج: يابيه هوه فيه قطر يخاف من جاموسة؟ ليه هوه قطر لعبة؟؟ المفروض إن أنا اللي أخاف من القطر.. بس بصراحة لقيت شكله ميخوفش وباين عليه عايز إعادة هيكلة.. قلت يابت إمشي علي مهلك.

س: وماذا حدث بعد ذلك؟

ج: لقيت القطر وقف أول ما السواق شافني.

س: ولماذا توقف القطار؟

ج: الشهادة لله أنا قلقت وتخيلت إننا في الهند والسواق هندوسي.. بس رجعت وقلت فوقي يابت.. إنت ف مصر.. والدليل القطر الصفيح اللي قدامك ده!

س: وهل توقف القطار كثيرا؟

ج: بصراحة سواق القطر كان راجل ذوق واستني لحد ما مشيت علي مهلي.. حد يلاقي دلع وما يتدلعش يابيه؟

س: وهل رأيت القطار الآخر؟

ج: وأنا بابص كده لقيت صفيحة تانية جاية من بعيد ورا القطر الأولاني وقاعدة تزمر برضه.. حاولت انبِّه سواق القطر وقعدت أجعَّر بصوتي وكل ما اجعَّر يشاور لي ويقول لي: إمشي براحتك علي أقل من مهلك

س: وما الذي حدث بعدها؟

ج: القطر التاني لبس في القطر الأولاني ومات شوية ناس كده

س: كم عدد المصابين والقتلي؟

ج: أنا مش عارفة العدد بالتحديد بس بيتهيألي إنهم أقل من عدد الغرقانين في عبارة السلام ومن عدد المحروقين في قطر الصعيد اللي فات ومن عدد معتقلي الإخوان.. وأكتر من عدد المحروقين في قصر ثقافة بني سويف.. يعني ممكن كده يبقوا قد اللي انتحروا السنة اللي فاتت من الفقر!

س: يبدو أنك مهتمة بأحوال البلد السياسية؟

ج: كله حصري علي التليفزيون المصري.. والبركة في النايل كوميدي والأستاذ عزب شو.

س: هل كنت تتوقعين أنك ستكونين سببا في إقالة وزير؟

ج: والله لو أعرف يابيه كنت جبت كل الجواميس أصحابي بعدد الوزرا!

س: هل أنت منضمة لإحدي الحركات المعارضة؟

ج: كفاية يابيه.

س: إذن أنت تعترفين بانضمامك لحركة كفاية؟

ج: يابيه أنا أقصد كفاية أسئلة.. هيه الواحدة ماتفكش معاك بكلمتين؟

س: في رأيك من المسئول عن هذه المأساة؟

ج: أولا أنا باسجل اعتراضي.. فين المأساة دي؟ دول شوية مصريين ماتوا.. وبعدين إحنا متعودين إن كل سنة الحكومة تعمل لنا مفاجأة كده زي موضوع القطر عشان نعتبر ونتعظ ونقرب من ربنا ونتذكر الموت.. أنا بأطالب الإعلام بعدم تهويل القضية وياريت نلتفت لمشاكل البلد الكبري والتحديات المقبلة زي مباراة مصر والجزائر.. بلاش تشويه لسمعة مصر بقي!

س: ما الشيء الذي ندمت عليه بعد هذه الحادثة؟

ج: إني لحد دلوقتي ما اتطمنتش علي البهايم اللي ف غيط الحاج طلبة!

س: هل لديك أقوال أخري؟

ج: أنا بس عايزة أطمن زملائي: الأخ «ماس كهربائي» والأخ «مختل عقليا».. إن الحمد لله الضغط خف عليهم وبقينا في الهوا سوا.. وإننا هنحاول الفترة الجاية نقسم المصايب علينا عشان الشعب يصدق.. مرة ماس ومرة أشرف توفيق

ومرة مختل ومرة جاموسة.. وهوه ده الفكر الجديد!

س: لقد تسببت في مقتل العديد من شعب مصر والسخط في كل أرجاء المحروسة.. فلماذا فعلت كل ذلك؟

ج: «من أجلك أنت» يابيه!


المصدر :::::::::::> الدستور